سياسة الخصوصية
آخر تحديث: ٩ نوفمبر ٢٠٢٦
باختصار
- المقاطع اللي تختارها تتعالج على جوالك، وما ترفعها لزقة لأي سيرفر.
- ما فيه حسابات، ولا تسجيل دخول، ولا إعلانات، ولا أدوات تتبّع أو تحليلات.
- ملصقاتك وإعداداتك محفوظة داخل جوالك فقط، وتقدر تحذفها متى ما تبي.
- الملصق ما يطلع من التطبيق إلا لما أنت تختار ترسله (سناب، واتساب، تيليجرام، وغيرها).
١. من نحن
«لزقة» تطبيق يحوّل مقاطع الفيديو لملصقات متحركة بخلفية شفافة. التطبيق من تطوير رائد الضيط، وهذي السياسة توضح وش البيانات اللي يتعامل معها التطبيق وكيف.
٢. البيانات اللي يتعامل معها التطبيق
| البيانات | ليش | وين تروح |
|---|---|---|
| المقاطع اللي تختارها أو تصوّرها | عشان نقص الخلفية ونسوي الملصق | تبقى على جوالك. التطبيق يحفظ نسخة مؤقتة وقت المعالجة وينظفها تلقائياً. |
| الملصقات اللي تسويها، والنص اللي تكتبه عليها، وتعديلات الممحاة | عشان تقدر ترجع لها وتعدلها | محفوظة داخل مساحة التطبيق في جوالك فقط. |
| الإعدادات (مثل المظهر وجودة القص) | عشان يتذكر اختياراتك | على جوالك فقط. |
ما نجمع اسمك، ولا رقمك، ولا إيميلك، ولا موقعك، ولا جهات اتصالك، ولا أي معرّف إعلاني.
٣. إزالة الخلفية تصير على جوالك
إزالة الخلفية تشتغل بالكامل على الجهاز:
- الآيفون: باستخدام تقنية Vision المدمجة من آبل.
- الأندرويد: باستخدام ML Kit من قوقل. أول مرة، خدمات Google Play ممكن تنزّل نموذج القص على جوالك. وقوقل ممكن تجمع بيانات تشغيل عامة عن أداء هالخدمة حسب شروط ML Kit، بدون ما توصلها صورك أو مقاطعك.
٤. الأذونات اللي يطلبها التطبيق
- الصور: عشان تختار المقطع اللي تبي تسوي منه ملصق. التطبيق يقرأ بس المقطع اللي تختاره.
- الكاميرا والميكروفون: بس لو اخترت «صوّر» عشان تسجّل مقطع جديد. الصوت ما ينحفظ في الملصق.
- الإشعارات (اختياري): لو فعّلت «نبّهني لما يجهز الملصق»، يجيك إشعار محلي من جوالك. ما فيه أي إشعارات من سيرفر.
تقدر توقف أي إذن من إعدادات جوالك متى ما تبي.
٥. لما ترسل ملصق
الملصق ما يطلع من جوالك إلا بقرارك، ولما ترسله يصير عند التطبيق اللي اخترته وتنطبق عليه سياسة خصوصيته:
- سناب شات: الملصق ينسخ للحافظة، وأنت تلصقه.
- واتساب وتيليجرام: الحزمة تنتقل لهم مباشرة لما تضغط «أضف».
- GIPHY والحفظ والمشاركة: عن طريق قائمة المشاركة في جوالك.
٦. اتصالات الإنترنت
التطبيق ما عنده سيرفر يرسل له بياناتك. الاتصال الوحيد لما تضغط رابط بنفسك (مثل حسابات التواصل أو هذي الصفحة)، فينفتح في المتصفح أو التطبيق المناسب.
٧. حذف بياناتك
- احذف أي ملصق بضغطة مطولة عليه، أو احذف كلها من الإعدادات ← منطقة الخطر.
- زر «نظّف» في الإعدادات يمسح الملفات المؤقتة.
- حذف التطبيق من جوالك يحذف كل بياناته نهائياً.
لأن ما عندنا نسخة من بياناتك، ما نقدر نسترجعها لو انحذفت.
٨. الأطفال
التطبيق موجّه للاستخدام العام، وما نجمع بيانات شخصية من أي مستخدم، ومنهم الأطفال.
٩. التعديلات على هذي السياسة
لو تغيّر شي في طريقة تعامل التطبيق مع البيانات، نحدّث هذي الصفحة ونغيّر تاريخ «آخر تحديث» فوق.